Danaska ću van pravit kako je jedan crikveni zbor šal obać rodno mesto biškupa Mahnića va prijateljsku nan i nikad bratsku malu državu ka je va Evropi. Šli su puni kuraja (aš to su van sve one generacije ke još ne dubitaju da poć va Evropu ni kako poć doma) ma jih je kuraj šubito pasal kad su prišli na granicu. Tamo su jih nikadašnji braća i sestre  tako lipo zmasirali jednu celu uru i pol, da bidu se najraje bili tornali nazad, ma su odlučili bit strpljivi. I tolerantni. I bakoviti da ča! Ča će njimi nikakovi Evropljani ruvinat dan.
 
Ben, lipo su i prišli tamo kadi su rabili i kadi jih je čekal turistički vodič. Čovik kad je vidil tuliki Boduli na broju, njin se je skužal i rekal neka mu oproste aš on ne zna govorit po hrvaški nego samo srbijanski. Veli problem! I zato da se ne bi Boduli razjadili on ćen njin dvi ure lahko pravljat o biškupu Mahniću po svoju. Ne moran ni pravit kako su ga Boduli sve razumili. Tar ovuda smo svi poligloti. Od nas svi očekuju da govorimo sve svjetske jeziki!
 
Ja san za to da sada mi Hrvati:
 
PRVO:  objavimo na našu televiziju i sve moguće mediji i da priko našega veleposlanika va maloj Evropskoj zemji pošaljemo ‘prosvjednu notu’ kako smo jako razočarani, iznenađeni i uvređeni aš nas tretiraju kako građani drugoga reda (ko su nami Čehi to mogli napravit, zač ne bimo mi njimi!?);
 
DRUGO: zabranimo svimi z male strane države ki ovuda jimaju kuće da va njimi obavljaju ugostiteljske djelatnosti (znajmljuju apartmani) – aš ki njin je dal dozvole za posal va stranu državu? I komu oni uopće plaćaju porez? I prijavljuju oni uopće svih tih Evropljani ki kod njih ljetuju ili su njin sve to kumpanji i rod?
 
TREĆE: svakoga stranca z male evropske države rabi fermat na granicu i kad jih se skupi dvajset, prisilno njin pušćevat barem pol ure sopile na razglas. Neka već na granicu vide kamo gredu. Pokle ča su habali pol ure sopile rabi njin održat tečaj puntarskoga, dubašljanskoga ili vršanskoga tanca, vrbanskoga, omišljanskoga i dobrinjskoga dvoglasnoga kanta ili istrijanskoga baluna.
 
ČETRTO: ko njin se ni ne tanca ni ne kanta, ondat jimaju alternativu za zbrat i to: poć hodeć i zvoneć skupa z halubajski zvončari od granice do ‘Vrata Jadrana’ zgor Rike. Kašnje se moru tornat po auto nazad na granicu.
 
Kad su sve to obavili ondat ćemo njin dat čertifikat da su postali KULTURISTI i ondat moredu poć na turizam va Hrvašku.

Zač je to potriba?
 
Ki je rekal da je potriba!? Nego vero ko ćemo jedni drugih zajebavat, samo naprid! Da vidimo kamo ćemo svi zajedno prit!