UVOD

Falinge su ono ča gre skupa z jako puno stvari. Kad delaš kuću (a delaš ju, ako si se prvo mislil ubit, pak si se domislil da je to smrtni grih ... ondat si šal delat kuću da smrtno ne zgrišiš - ovo se odnosi na prosječnu raju* - na nadprosječnu mislin jušto onoliko kuliko i ona na me); dunkve, kad delaš kuću ondat kad je sve tobož gotovo moreš počet brojit falinge. Ja san va mojoj šubito prestala brojit, aš bi me bilo kolpalo ili bin bila finila na Rab (va Kampor).

*raja - ljudi ki obitavaju va "raju na zemji".

Ondat, kada se ženiš (kod nas van se svi žene, mi ne kompliciramo z jezikon). Onaj lipi mladić va koga si se zaljubila, priko noći postane nikakov leni debejan ki bi samo spal po cele dni, ili te pešta po dnevnomu rasporedu ili stalno gre na kurve ili loče pak misliš da spiš zi dumižanu, a ne z mužen ...

Isto tako pak i ona lipa divojka va ku si se zaljubil, priko noći postane nikakova čanža ka stalno bruntula, sve bi da je po njezinu i stalno ti kopa po takujinu i nikad njoj ni dosta to ča doma prneseš. Ondat ti počne govorit da se ugjedaš na vridnoga suseda ki dela već treću kuću z apartmani, i da si ti jedno velo i obično niškoristi i prokjet bil dan kada je postala tvoja žena! Ben, i to su falinge ke prekasno vidiš. Njih nimaš ča brojit. Moraš jih zet takove kakove su ili moreš poć drito na sud po rastavu braka. Ko vero ne morate, ne delajte toga. Aš zada prvih falingi, obično pridu druge - još i gore!

Niki ni savršen. I niš ni savršeno. I bolje toga na ovomu svitu i ne iskat. Ma ... jedino ča mene jako zakučuje to je kad čovik zgubi pojam ki je, ča je, od kud je ili kako to lipo rečedu - kad zgubi identitet. Zaman mu bandera na kući za svaki državni blagdan - ča isto ni baren ovdi na Boduliji nikad bil del folklora.

Sinjali ste kako svaku šetemanu prebrajamo z kuda auti hode priko naše granice i o tomu na velo pišemo va žurnali. I kokodačemo na televiziji. Kako da nan auti hode, a ne judi va njimi. Tako nabrajamo Njemci, Austrijanci, Holandezi ... a istina je da je va Hrvatskoj najviše gosti z Jugoslavije. Neka nje više ni, ma gosti su z Jugoslavije. Samo ćakulaju po njemački va najvećen broju i to z jednin smišnin naglaskom. Drugi ćakulaju niki skandinavski jeziki za ke ne moren o naglasku niš reć, a va zadnje vrime fanj njih ćakula i po inglešeki.

I z nami nego ča. Naši su se judi vavik volili "delat ingleži". Tupe ga oni po svojemu, sve dokle jih ne sprovociraš. Ondat, zač je naš jezik najbogatiji za kljet, progovore na materinjemu! Tako vidiš od kud su zapravo.

FALINGA PRVA

Ovo je zaprave jedan pamflet za naši milicajci. Zač?
Aš njih nigdir ni ni pod razno dokle dura sezona.
Oni će prit vanka zi svojih mišjih škulj kad svi idu ća. A ondat će se na nami domaćimi ličit kako pantigane.

Ćo, milicajci! Ne bojte se fermivat Slovenci ki po cestami delaju makakade da bin ja za pol takove va Sloveniji finila va pržun! Oni vas jako dobro razume ma kuliko se delali evropljani!

Ćo, milicajci 2! Ne bojte se potirat zi privatnih drmuni Čehi i Slovaki ki tuda kampiraju! Za jednu običnu seljačku feštu su digli jako vele sanitarne norme, zač bi ondat kolo ceste i posvuda naokolo imili izložbu govan raznih veličin i koluri i to od ljudi za kih se i ne zna da su ovdi aš nisu nigdir ni prijavljeni, ne plaćaju ni boravišnu ni ekološku taksu!? Oni vas jako dobro razume ma kuliko se delali bedasti - to njin je taktika!

Ćo, milicajci3! Ne bojte se fermat auto z austrijsku, njemašku ili holandešku registraciju. Zač bi on mogal parkirat kadi će i okrećat se na cesti kadi je zavoj i puna črta, a meni bite zeli vozačku radi toga!? Ne bacilajte, oni vas jako dobro razume! Va autu su Bosanci, Srbi, Hrvati ki su pobigli ovoga rata ća - to ča se delaju da su pali z kruške - to njin je ostalo va genimi.

Ćo, milicajci4! Ostali su van još onih par Rusi, neš malo Rumunji i Talijani! Fermuj!!! Ni njih ne bi bilo briga ča jih ja ne razumin va njihovoj zemlji! Propisi su propisi! I neka nauče ingleški - a bogme, mogli bite već jedanput i vi!

FALINGA DRUGA

Mi smo ovdika zgjeda pobrkali lončići. Smo, i to već ozdavna! Pomišali smo nike fraze i besede. Pomišali smo "bit ljubazan" i "bit bedast". Zato i imamo FALINGU PRVU.

Ljubazni moredu bit konobari, prodavači, slastičari, šalterski radnici ... ljubazni moredu bit ljudi na cesti ko rabi nikomu pomoć, ko se je ki zgubil, ko ki neš ne razumi ... Ma ne moramo baš ljubazno i smijuć se kako mone gjedat kako nas niki zajebava va zdravi mozak, kako krši zakon, kako se bahati i prodaje nan niku svoju filozofiju ku ni doma ne more nikomu prodavat.

Nećeš zato da biš bil ljubazan, nikomu blagu bez konopa pušćat da ti demolira kuću, aš on misli da je to normalno kad platiš nigdir smještaj. Nećeš radi svoje ljubaznosti trpit ni da ti niki bleji pod puneštru kolo tri, četire ure jutrin - aš, ti moraš poć delat. A i da ti tako blejiš nigdir drugdi već bi te niki ljubazno zapeljal va niku stanicu milicije.

FALINGA TREĆA I NAJVEĆA

Ono ča nami i našoj zemji fali je samopoštovanje. Mi se odvavik jako volimo hitat pod noge drugimi. I vavik je njihovo bolje, pametnije, lipše ... Tako je bilo i prvo rata. Pa nan se je zato rat i dogodil (između ostaloga - ma o falingami va glavami neću). Tako je ostalo i danas. Niš se ni prominelo - samo kultura i kvaliteta gosti ki ovamo hode - i to na gore. Na puno gore.

A bit će još i gore, ako njin ne budemo počeli pokazivat da su prišli va zemju kadi je kulturi mat dudu va usta stavljala. Ako nan se crikvice od skoro kad je Isus po zemji hodil ne budu videle od reklam za picu; ako nan za bašćansku ploču budu znali samo oni ki pridu na boduliju i gredu baš va Bašku i to samo oni od njih ki jako dobro vide pa primjete one dva brižne putokazi - ovo spominjen aš su to falinge kimi ja svjedočin svaki dan, već na leta.

Ne znamo ča bimo sami zi sobu. Ne bimo da nan je buka po mestimi na otoku, aš onda nan Zagrebčani ki su prišli na odmor ne moredu spat pa su jako jadni i prite nan se da će prodat kuće!
Zato smo noćni život zbrisali i ono malo ča ga je bilo. Kako ondat turizam to mislimo jimit!? Mesta su nan kako groblja.

"Mića zemja za mirnu smrt!" ??? Ča to!?

Domislimo se već jedan put. Počnimo prodavat svoju kulturu, a ne nekulturu. Ča Dubrovnik? Dubrovnik je jedan ma ni i jedini. Svaki naš otok, svako naše mesto i grad ima svoju bogatu štoriju - i to ne samo oni na moru. Cela naša zemja bi morala bit ponosna ča je to baš ona i počet prodavat kulturu. Svoje štorije, svoje imena. Pak ondat neka oni ki pridu imaju onaj osjećaj kako i kad hode kolo kuće od Salvadora Dalija - zač ne!?? I to su štorije! Neka imaju osjećaj da su na posebnomu mestu na svitu, aš i su!!! Samo ga rabi oživit - od svoje prošlosti.

Ondat ne bi hodili više oni ki ne znaju zač ovdi moraju platit kruh va butigi, a ti isti va Španjolskoj ne pitaju zač moraju platit ko će sest na klupicu va parku - nego plate i muče!

ZA KRAJ

Mići smo, da. Ma vavik je i manjih! Samo više obrnjenih sebi, a manje drugimi!

Na svidenje!!!!