... ili kako bi Gego rekal "Sve je lounge sve je spa".

Demonstrativno odbijan habat više reklame z televije i čitat portali ki na sebi imaju napisan, mej drugin, link do nikakovoga "manager.kr" ili ča god takovoga.

Ma habate Vi njih uopće!?
...Ili jimate ugrađen onaj čip va glavi priko koga nas programiraju niki moćnici kako to njimi odgovara. (Izvor: nika moja novica od neznan kada)

Domišljan se kad san hodila va školu kako smo na PTO učili programirat va (čitaj kako piše aš je tako i moj profešur govoril!) Basic jeziku. I sve mislin kako niki tamo puknjeni Merikan ili Englez (aš oni su vrhunac munjenih) sprid sebe drži jedan Mekintoš ili Epl i programira:

"Sours - Balkan pipl (enter) Nid - wor - (goto) - vajld (enter) - Intenšn - mor mani (end)".

Dobro, to je pasalo. Sada smo reprogramirani. Sada nosimo tri, četire mobiteli kolo pasa, va svakomu žepu i va torbu. Tečemo kako maneni aš da je vrime šold i ne smi ga se zgubljat. Digli su cenu od dizela pak sada prodajemo dizelaši i kupujemo benzinci (aš su ONI to zaslužili!). Hitili smo slike zi zida i putali plazme na njih. Fasade piturujemo va koluri svake šorte. Nikakovi poslovni gurui z Merik nan hode ovamo držat predavanja kako bit pronat za uspit - moreš mislit! Bolje da su nan poslali Pabla Franciska (stendap komičara) pak da se magare malo hihizdrimo. To nan zi svin dobron kolo nas sve slabije hodi. Da se malo kalmamo. Ljudi moji ćutite vi kako ste ander prešr i ful of tenžn!??

Ste svjesni koliko je kratomanskih paranojici kolo vas! I ča je najgore ozgor vas? Ste se kada zamisleli kolo toga da je sve više munjenih sto posto posvuda naokolo, a da su va ludarami ili oni kimi ni niš, ili oni kimi neš je ma nisu opasni. Opasno munjeni šeću. Da šeću!!! Na pozicijami su va društvu! Odlučuju o našemu bit il' ne bit. Direktori su, vlasnici i sve tako dalje ... i svako malo ovamo dopeljaju nikakovoga gurua (još munjenijega od njih) da nas nauči živit! Sakramentada sakramenska!!!

Ti ćo, ča meni će jedan Merikan predavat kako ću ja bit uspješna!?? Tar uspješnija ne moren bit!!! Živin z par krediti i z malu plaću već petnajst let najmanje. Neka pride on meni da ja njemu održin predavanje! Dat ću mu i praktikum - moju plaću i moje računi i moj posal. Pak da vidn koliko će on tako uspješan zdurat!!! Ne bi mu pomogal ni malo jači guru! Pokle četire dni bi se obisil za vodokotlić va zahodu.

Najlakše je sitomu lačnomu pamet prodavat!

A vi lipi moji!?

Vi ste kako hipnotizirani. Sve je lounge sve je spa! Sve je špica! Morda bite kakogodare i na televiziju mogli prit! Živite na oblačiću ki je onomu Merikanu ozgor glave - ma to ste zabili adoćat.

Vi ste pozabili naše lipe običaji. I kako je lipo i antistresno bit zi svoju fameju, bit mat ili otac! Imit uopće fameju!!! Znate vi još kako je lipo popit zi svojin mužen/ženu kafe na balkonu? Kroz dan kad god i vidit svoju dicu!?? Smet se susedu kako hodi po česti i češe se za guzicu, a onda povonja prsti ... Tuti je zdravlje lipi moji! Va malimi stvarimi ke nijedan šold ne more kupit!

Znate vrime ni šold! Vrime je vrime i pasa dokle trepneš. Za čas pride starost a ondat ...??? I oni ki su danas tobože kul i oni ki nisu postanu samo jedno STARI! A stari ljudi svakomu smrde. Znate da šold još nikoga ni udelal boljega nego ča je!? Da od primitivci nikad ni udelal gospodu!? Da od Balkanci nikad neće biti Merikani!? Zi šoldi i prez njih svejeno.

Zagasite čip! I znate ča!? Mi smo se ovuda valjali va svakakovomu blatu. Ki živ, ki mrt (tih jednih će mi vavik bit žal!). Kaša kakove se malo ki spamećuje ... I fanj smo toga poroštali. Ma - bil je rat!!! Istešo, nami još niki ni (a ko se ne zbudimo morda i će) hitil va sred beloga dana, va dobu mira i prosperiteta (takovoga ovdi ja mislin neće bit - opaska hudoga autora) najveće kuće va državi fondo.

Merikanu je!

I sve se još vavik nadan i verujen da, kada bi me posrid česte tombalo auto, da bite mi vi - magare ki god od vas, pomogli. Kako ča se je onaj čovik hitil va Savu za onu žensku da ju spasi. Još vavik vas je ki bite pomogli!

Merikan ne bi!

I to valjda pravlja dosta samo za sebe. Ne daj Bog da se pretvorimo va Merikani! Ko se to dogodi, sudnji dan nan ne gine.

Ovakovi munjeni, ma još vavik z malo duše, nikakova smo ravnoteža mi prezreni na svitu. I sada ću fermat, aš san sama sebi počela naličit na Jehovicu. A Jehovica nisan. Nego ...

Ma, ča Krško da se je neš pokvarilo!??

Sve je lounge sve je spa! Una minuta i tutto pa-pa!

Kušujen vas ja!