Gjedate vi ča "imanje" (ovo ni baš prava beseda, ma ni mi ne živimo va Teksasu pak nikomure niš) od Nove TV?

Meni je taj rialiti vero simpatičan, aš je prava pravcata preslika od stanja va našemu društvu.

Ben ovako:

-         vavik mora bit jedan šef ili šefica. Taj isti va hipu kako god postane šef, promini facu i počne gjedat nikako drugačije … onako va stilu "ki će mi ča";

-         moraju bit i sluge, i to odmah dva, aš je opće poznato da na jednoga šefa gredu najmanje dva sluge;

-         magare jedan mora bit na bolovanju – to po zakonu;

-         magare jedan mora bit žrtva – to van je onaj ki najviše dela i kad ni sluga, stalno to govori i niki ga ne razumi;

-         magare jedan mora molit – bez toga danas ne pasiva niš – mora bit ravnoteža;

-         nikuliko njih moraju jako volit blago – aš i blago ovdi ima svoje prava;

-         svi su obavezno jako lipi, šarmantni i pametni – kakovi drugačije bi ovdeka mogli i bit!??

Tako. To bi bil takozvani "ustroj" imanja.

Kad se je lipo sve "ustrojilo" ili kako bi se kod nas reklo "poredilo", a kako smo mi va Hrvaškoj, da ne bi vero sve funkcioniralo kako rabi, moraju se pod mus formirat "stranke": lipši skupa, malo manje lipi skupa; leni skupa, delavci skupa; oni ki fumaju skupa, oni ki ne fumaju skupa; pohotni skupa, čedni skupa; hudi skupa, dobri ... hm, a ki su to!!!?? Kokoše!

Ben i one su skupa ...

Još neš nan mora past va oko. Mi se Hrvati nikako najlakše naviknemo na šporkic. Toliko o našoj potribi za se tuširat i po par puti na dan.

I jako volimo prdit – da nas se čuje. To gre jako dobro skupa zi velu ćakulu od seksa. Smo najveći evropski jebači, ili nismo!??

Ja van kažen da nan se vero i vidi!!! Sve jedan dim od prašenja!

I tako bome jimamo samo jedno televizijsko imanje – jimamo znanje o tomu kako funkcionira življenje va našoj državi.

Aš dokle gjedamo njih vidimo bome svaku firmu, svako udruženje građani, svaku bilo kakovu interesnu (aš danaska je sve radi interesi) zajednicu kolo nas. Vidimo i sebe.

Kadi god je skupa više od dva čovika, "ustroj" je isti. Svi se jako vole i "furaju se na tim", a čin se jedan makne oni drugi ga zemu va ćakule. Svaki te gjeda va oči i laže ti kako pas i ča je najgore od svega, ma sudeć po "imanju od Nove TV" va takovimi štalami više nikoga ni briga ni ko te ki vidi dokle provodiš te svoje šporke rabote. Bitnije je imit silikon va sisami ili bilo kadi drugdi nego gram mozga va glavi - silikon se bolje plaća. I uputno je bit najmanje "tri va jedan" proizvod, ko već ne morete bit "šest va jedan".

Jedna stvar nan se deboto mora priznat – vjerojatno na svitu ni boljih simulatori i manipulatori od nas – toti nan ni para. Bome ne! Svaka nan "čast"!