Gjedan čera va televiziju, a misli mi biže na sto drugih band (niki mi je pravil kako je pak niki drugi imil majicu na koj je pisalo "Ja srce kopat nos" - pak san se domislila kako bi takovih majic rabila imit svaka bolja autoškola i poklanjat jih svakomu novopečenomu šoferu) ... Na televiziji "U sridu", vidin susedu zi Rike Vedranu Rudan kako se va svomu stilu obrušava na mladići i sve ča je muškoga roda. Neka, i rabi. A rabi imit i nikakov svoj stil ... Sve je to marketing.

I sve bi to bilo lipo i dobro, da to njezino obrušavanje ne zgjeda kako Don Kihotova borba z vjetrenjače. Da, baš tako.

(Čekajte, muž mi je jušto nikoga vraga razbil va kuhinji! Bemu miša! Čujen kako pobira komadići stakla po podu. Ne gren ni pogjedat aš ću šubito dobit visoki tlak. Ja san žena ka voli mučat. Slika je, tona ni.)

E da, kadi san ono fermala mislit!? Aha. Digo, raspalila Vedrana po muškimi. Aš je ženska i va svojimi letimi o muškimi zna sve ča znamo i mi sve druge ženske u nikimi letimi. Ali ča!? Kad bimo mi sve rekle da je to baš tako, i da smo mi ženske za sve ča nan se dogaja same krive, morda bi nan bilo i bolje.

Ma ne, mi ćemo se prvo pokosmat mej sobu. Aš nami je vrhunac dosega va našen brižnon pipičinon životu pijažat se muškomu. I zabadat ćemo noži jedne drugimi va škinu, delat se pametnije od drugih, a o lipoti da i ne govorin, samo ko će se ki god kukuriku dignut komu god mej nogami vero radi nas.

I onda, to sve adoća Tvornica duhana va Rovinju (ka nikad, ma nikad - nedajbože ne bi reklamirala cigareti aš je to va ovoj našoj štali zabranjeno) i onda udela one Dumbo plakati - da Dumbo, aš ki god se na ono ćapa je slon; i obljepi ž njimi celu terru inkognitu i onu manje inkognitu.

Obadva plakati su za "Onih ki postižu više" (čitaj: za muških). Na jednomu je ženska zamišljena kako krava ka se zahićuje na črljeno platno ko drži jedan čistokrvni pastuh z pedigreom. Njoj moren i oprostit aš je bjonda (čitaj: plavuša).

Na drugomu, onaj ki postiže više (muški koga ne vidimo nego samo njegovu ručinu) igra šah sam zi sobu, a šahovske figure su ženske - puno ženskih i da, nego ča ste mislili: on ćapa jednu za frizuru i š nju hiti drugu i tako stalno...

Ženske moje, vavik mrnjaučete nikoga kukuriku! Te BaBe, te bebe, te prava, te ovo te ono; a na ovu sramotu mučite. Zač!??

Znan ja zač! Zato, aš smo mi ženske takove bedakuje kakovih svit ni vidil ni va jednoj drugoj živućoj ni zumrloj vrsti. I zato ča ne moremo optužit muškoga za to ča smo mi i samo mi i to samo po svojemu izboru BEDAKUJE.

Amen. (čitaj "i to je sve ča sam o tomu imil za reć" F.Gump/prevod z engleskoga na čakavski Bodulka)