... ma zajebavan se. Ne krepuju tići, ma krepujemo mi habajuć njih kako va Opatiji misle da kantaju da bi zibrali najboljega mej najboljimi (aš to je valjda najbolje ča Hrvaška jima - aš sve najbolje ča Hrvaška jima šalje se va inozemstvo).

Ma, kako je ovoga leta Evrovizija va Beogradu (aš ju još nisu otkazali) to je morda ovo šporka politika pak se Hrvaška želi liberat onoga ki je najgori - aš meni je glasovanje jušto na to naličilo. Kako da se zbira najgori. Najbolji su ostali mej zadnjimi. Ni nikakove šanse da ti isti pasaju va Beograd i da njin se čagod grdoga dogodi.

Jedina pametna ka se je dogodila čera večer je ta da su glasači va Hrvatskoj pokazali više one glasačke zrelosti nego kada su bili izbori za Sabor i da su čera jimili toliko sluha pak su prepoznali da je šjora Graktalićka zakantala srbijansku Molitvu va hrvaškon aranžmanu. Zgjeda da njin je sinulo da bi to bila ober sramota poslat va Beograd - a morda je rabilo ... lipo bimo se bili posrali!

Neš mi govori da je i samo Ministarstvo za vanjske posli toti zamišalo prsti. Ni nan dosta ča su nan tamo ovih dan zapalili banderu, razbili puneštre i grb na ambasadi - nego bimo njin još poslali i njihovu kanconu va našoj interpretaciji. Dijo mijo! Kakova bi to provokacija bila! Aš danaska je ovuda svaki drek provokacija. I svi su jako osjetljivi na nju.

Komu god ne smiš reć ni dobar dan - šubito ti doleti kacot mej oči. On se je stal na livu nogu jutros, a vero ti si se našal provocirat ga z rana jutra govoreć mu da je tebi dobar dan. Biž ća mali dokle još glavu jimaš na mestu! Ovdi nikomure više ne smiš govorit da je dobar dan, ni jutro, ni večer ni da je lahka noć. Ki god bi te mogal ubit radi toga. Ovdi moraš govorit samo kako je grdo vrime, ava kako te boli glava, kosti ... po česti moraš hodit zi znemenin liston z osmrtnicami od Novoga lista i komentirat kako je opet jedan brižni mladi umrl, nebogi otac i mater i baba i ded i brižna divojka ka se neće oženit. Jedino z čin se još moreš pokazat vanka je uz osmrtnice još one četire stranice črne kronike samo zi tvoje županije ...

Ben, to smo se dogovorili! Tako lipo hodite po česti i još morete za promjenu teme govorit i ovako na sav glas: Jeben mu šefa i poduzeće i Elektroprimorje. Ča si vidil koliko je i benzin poskupil. A voda! Jeben njin drmun njihov! Mi va kući smo na šterikami, a peremo se jedanput na leto i istešo nan hode računi kako da smo va Nevjorku! ... E i takova van beštimada garantira da van niki niš neće - jedino morda bite mogli finit na sud ako nikomu va njoj ime spomenete - aš duševne boli su jako skupe va zemji z ovolikimi krišćani kako ča je naša! Atento na njihove duše zato!!  

Ben to van je to z Bodulije. A da jima još neš. Kako stvari stoje zgjeda da će počet popravljat onu našu čestu po otoku o koj san van već pisala. Ma ne još ovih dan ... još je rano!

Čeka se Uskrs i prve turisti. E ondat se počne delat glavna i jedina otočka česta. Ovoga leta ćemo prodavat ovuda OFF ROAD ARANŽMANI!

Ala bog!