Već su i bedasti videli da nan turistička sezona ku svi čekamo kako kravu muzaru ka se je zgubila na putu od paše do štale, traje sve kraće i kraće. Zi svu našu infrastrukturu i nove ceste i autoputi...

Koliko se je puti dogodilo da na radiju jave kako su vele kolone sprid tunela Sv. Rok, a z toga tunela vanka gre par auti. Kadi su oni drugi, pita se čovik, da njin se ni ča dogodilo!??

Svakako, zahvaljujuć ovimi ekstremnimi teplinami ke su čak i nami ovuda ki smo već navikli, počele delat zdravstvene i tegobe svake druge vrste, nikako je ovih dan počela i ta prava takozvana ful sezona. Ona će, ako Bog da sriće potrajat do Vele Gospe, i onda će odjedanput svi poć ća..., ako zadažji, poć će i prvo Vele Gospe. Na Talijani se ni više ča ufat, aš oni su kako i svi normalni (valjda normalni) ljudi počeli isto zimat godišnji i va drugimi misecimi i ne gredu više kolektivno na onaj feragošto kako ča su nikad.

Ben, imamo lazno malo manje od misec dan da jih ogulimo i poberemo njin sve šoldi z takujini. Aš onimi ki pridu prvo leh je počela ful sezona nimaš jako ča ni zet. Oni ovamo pridu malo zaštedit. Otkrili su da bi mogli ovdika još čagodare i zaradit pa po noći obahajaju one žute kontejneri za plastične bočine, a jutrin jih nose na "sabirna mesta". Lipo ćemo mi tako od turizma živit!

Ma, nismo ni mi bedasti. Prnesli smo za drugo leto novi propis z kin smo proglasili ful sezonu svih letnih miseci. Pak ćemo onda imit veće cene od početka šestoga do prvi desetoga. Zmislili smo se mi kako ćemo povećat dobit!

Jedino ča nismo, nismo se zamislili zač je ovo sve ovako kako je. A ovako je aš smo bedasti. Zatvaramo butige na osan, zatvaramo kafići u pol noći, niš ne dela po cele noći (samo benzinske). Kod nas hode judi z miću dičinu i oni ki su za umrit. Puno jih to ovdi i obavi. T'r i je opći dojam večer kako da si va jednoj veloj mrtvačnici. Jedino ča se čuje je kako se otvaraju i zatvaraju vrata od "lednički".

Ako se udela kakova god fešta, već drugi dan će prit dvi tri stare vikendašice kod nadležnih organi i dignut kriku i bleku kak to ni moguće i kak su se one došle tu odmorit a ne slušat taj džumbus po cele noći. Stara moja si mogla lipo kupit jednu hižu v zagorskoj kleti pa biš bila imela mir. Koga Boga je timi ljudimi da pridu mir iskat va sred sezone na Kvarner??

To je prva ka nas zakapa.

Druga su apartmani.

Onoga dana kada je počela hiperprodukcija apartmanskog smještaja na Jadranu, toga dana smo turizmu rekli "laku noć". Aš to nisu gosti ki će poć vanka pojist ni popit. Oni neće poć pogledat ni koncert njimi u čast. Zač bi kad imaju kablovsku, frižider, šparhet i celu onu špezu ku su od doma prnesli i ku rabi pojist. Imaju i klimu, a vani je za krepat. Mesto da smo udelali smještaj ki će ljudi tirat vanka u potragu za osvježenjem i zabavom, mi smo se dali tuć nikakove zvezdice i fermujemo jih po svojimi kućami. Baš lipo!

Pohlepa pojedinačna i kolektivna će nas koštat, pa moremo mi lipo proglasit ful sezonu i od prvi prvoga do trejset i prvi dvanajstoga.

Niman previše let, ma ovakovih se gosti ne pametin. Ovo i nisu gosti, ovo je neč nami slično.
Svaki daljni komentar je suvišan!

P.S. Ko van se čini da se ponavljan, u pravu ste. Morda komu dopizdi pa konačno ča god i udela da se stvari promine na bolje. Morda se komu deblokira mozak. Ponavljanje je majka mudrosti!