E da. Samo ča ni ovdi ... Novo leto! Ajme ka vela stvar. Opet će prit prvi prvoga i ča!? Niš. Potle njega drugi prvoga i tako dalje. Kako i vavik, sve tako do trejsetiprvi dvanajstoga i onda će opet prit Novo leto.

I ljudi će opet brojit od deset na zdolu i onda kad rečedu nulu kričat i pizdit kako da su jušto doživili prvi orgazam u životu. "Ideeeš" ... bidu rekli na je'nomu od kanali naše mile televizije.

Inače, ja brojin od deset na zdolu svaki dan po jedno pedeset puti i mene jednostavno to više nikakore ne more uzbudit, a kamo li da bin kričala kako munjena kad priden do nule.

Nikako, ča san starija moran brojit od sve većega broja na nazad da bin prišla do kakove-takove satisfakcije. "Fakat!" ... i ovu besedu su počeli jako upražnjavat na našoj televiziji, a ja je se sjećan tamo od kraja sedandesetih i ranih osandesetih i nikako smo ju vavik vezivali za Purgeriju mi domorodci z provincije ... i sve mi se čini da je ta beseda nikako opet prišla va modu skupa zi uskrsnućen Štulića. O komu već dva tri dani nisan nigdi niš pročitala (Da mu se ni ča dogodilo!? - bi rekli Grobničani).

Sve čekan (od navike) da se pokaže na ekranu niki lik i da nan počne govorit kako nan želi sve najbolje va novomu letu. I da će novo leto (za razliku od staroga) bit teško i da će to bit leto odricanja i stiskanja kajiši, ma da je sve to za naše bolje. I čini mi se da otkad znan za sebe, tu čestitku ovi gori samo prepišuju jedan od drugoga ili ju i ne prepišuju nego ju predaju jedni drugimi va nikoj zaostaloj Titovoj štafeti ku ovaj ni uspil dobit, aš je na vrime umrl; i onda znemu taj papirić ž nje vanka, obnove sjećanje na tekst ki se pedeset let ne minja i odrecitiraju ga u maniru pravoga pionira pred kameru.

Samo, nikad su va pozadini stale nike zastave črjene i nikakove baklje ke su sve skupa gorile; a danaska su tamo jaslice z Isusićen kolo koga je stoka sitna zuba (jedini ljudi su Marija i Josip) ... i puno puno blišćećih svićic (za odvlačenje pozornosti od pročitanoga teksta).

Ljudi moji. Ja van i ne znan ča san ovdika svega nadrobila. Ma kad more Ivor drobit, moren i ja. I ča san van još otila reć!? A-ha! Ne trošite previše. Aš prvi misec rabi preživit. Svi računi će prit na vrime ne bojte se za to. I ka god opomena - vajer pokle prvoga. Ča će van!? Novo kako i staro ovisit će opet kako i svako drugo isključivo o našoj umjetnosti preživljavanja u sve većen po broju Danteovom krugu Pakla. "Survajvor" svaki dan u svakoj autohtonoj hrvaškoj kući - zato i ni uspil onaj umjetni. Kako bi i mogal puli nas ki preživljavanje imamo u ono malo črnoga šoto svakoga nohta!

I ne znan koliko hiljad lačnih krav je već pasalo, a nikako da pasaju sve (a rekli su da jih je samo sedan!).

Zato van ja želim puno umićnosti i lukavstva u stavljanju zi šupljega u prazno i ne stiskajte po čepu dokle po tapunu pušćate. Ma znate ča!? Srićno van Novo leto!
I meni skupa z vami ...