Lipo! Kako da san čera pisala kolumnu ka se zvala "Novo leto", a na; već opet pišen istu takovu. Dobro ne baš istu, ma istešo to vrime pasuje kako munjeno i ne da se fermat.

I kako gremo ovoga leta va novo!? Ki god va novimi, ki god va starimi postolimi. Ki god bogami i bos. Niki srićni, niki žalosni, sve ovisi o tomu ča njin je život naumil sparićat. Svi skupa fanj lahkih takujini. Niki z kumpaniju, niki drugi sam ... Svaki nikako, to je još Petrica Kerempuh znal.

Božić je za nami. Crikva je svakako ovoga leta odlučila reć da ni zatvorila oči i da se ni njoj ne pijaža va ča smo storili "Tihu svetu noć". Ni meni se ne pijaža. Već petnajst let. I stalno govorin kako mi je lipo bilo poć na Badnjak na polnoćku, nikad kad je to tobož bilo zabranjeno (ne znan samo kadi to!) i kad bi pop bil od crikve bil napravil hram veličanstvene svečanosti. Z plave svitla kako naznake rođenja svitlosti i tihu i decentnu muziku, z ku je u pozadini mogal celu mašu mašit ... Mirisale su te polnoćke nikako posebno, nikako mistično, na smolu i tamjan, na neš ča nami ni dokučivo - na neš ča ni svakodnevno. Ča se ne more kupit.

Ljudi su zi crikve hodili vanka nasmijani, punih srca, drugačije je to bilo čestitanje ... svaki bi bil nikoga našal i onda bi svi finili skupa u onoga drugoga na kolači, čaj ... do sitne ure. Smeli bi se i zi svake se je kuće čul smih i žamor ...

Sada pridemo z auton. Jedva čekamo da maša fini. Opet se ukrcamo u auto i partimo se doma - tobož prosvitljeni. Čestitamo onako "aš se mora" jedni drugimi i gremo spat. Namor i pogledamo ko je ča šoto bora, na komu moraju bit balice za ke smo pročitali va Gloriji ili nikon drugon listu ko nas uči životu zi stilon, da su ovoga leta va modi.

Skoro svaki je znači va ovoj našoj lipoj državi neš dobil ovih zadnjih dan. Ki je ča mogal. Nismo svi istih zahtjevi. Svakakovih nas je. Ki god će bit srićan i z bušićen va obraz, ki god ni ni z celin drmunon.

E da tako van je to. A svaki dobi baš ono ča ga sleduje. To su čuda na ovomu svitu kih mi ne primjećujemo a priko kih nan Bog govori!

Ča ni nan "HE-WHO-MUST-NOT-BE-NAMED" lipo rekal pred desetak let da smo stoka sitnih zubi!? Ča ni nan taj isti rekal i da ćemo "MI HRVATI" imit svoju državu makar koreni jili!?

Nismo mu zamirili ča nan je rekal da smo blago, ni to ča puno nas ji koreni va pravon smislu besede. Prema tomu sad je od nas lipo dobil svoj drmun. I nisu zadovoljni njegovi! E jebemu miša, a ča bi drugo blago moglo poklonit nego drmun!??

T'r to je sve ča blago ima!

Mir z vami ljudi. Budite mi zdravi, veseli i debeli (ma ne previše aš ni dobro za tlak), volite, budite voljeni i vidimo se k letu!