Bogdaj ljudi!

Ko se pitate kadi san i zač me ni (a vero ste se zaželili čitat ove čakavske besede - "lol" bi se reklo na kompjuterski!), niš mi ni, ovo san! Samo mi fali vrimena. Ja san van se lipi moji sto posto hitila va hrvaški predsezonski mod pa sve delan na veliko. Kako drugi tako i ja.

Ovdi na Boduliji (a ovo je skoro pol maja!) pikameri i motike na svakomu koraku. Lipo greš na kafe jutrin, zibereš jedan stol z pogledon na more, jušto se namestiš, zapališ cigaret kad pridu dva tri mladići z kakovu god pneumatsku spravu i počnu nabijat kako munjeni vero sprid tebe. Prvo oglušiš, onda vidiš da ti je kafe puno prašine, onda ti ta prašina ide i va oči i va grlo, onda se digneš i mesto da si se lipo opustil, jadan kako ris i nervoz kako direktor ideš doma.

Doma milijunti put provaš razumit zač se vavik navelo počne delat onda kad turisti već kako mravi šeću ovuda. Ča mi vero zapravo mislimo kako će nas više cjenit i volit ako svakoga leta gjedaju kako smo mi vridni kako delamo i pokažujemo njin kadi to trošimo onu boravišnu taksu ku njin već na leta naplaćujemo!? Će jedan klinac!

Da nas ne bi previše volili i da ni straha od toga, ovdi na Kvarneru se svakoga leta bacila prebit na mrtvo ime baren jednoga Talijana. Ako to ne udelaju Matujci i Opatijci, kolo toga se bacila na Boduliji. Ben, tako da ni straha da nas bilo ki počne previše volit. Takove novitade vajer se najdu va domaćoj i va stranoj štampi.

Ja se sve nadan da nisu valjda toga Talijana speštali zato ča je niki gradski otac od Venecije izjavil da smo mi Hrvati najšporkiji i da skoro goli šećemo po Veneciji (pak je sada i Venecija zmislila da je Markov trg čedna zona! - a vi ste se smeli lani Vrbenčanimi! - sve se vraća sve se plaća!). Z druge bande, kako nas niki Mlečan tamo ima pravo uopće nazivljat turistimi va Veneciji, kad mi tamo po svojemu hodimo i takorekuć smo doma! Pa se kako doma i ponašamo. Ča ni tako!?

To je bila druga, a treća!??

E treća je ta da san se već prestrašila da ove predsezone va naš lipi i pitomi i najlipši na svitu Jadran neće prit ni jedan morski pas. I jušto san već pravo da van rečen bila malo i razočarana, kad jutroska na! Va Novomu listu lipo piše kako je prišla beba od kitopsine i zaplela se va nikakove mriže.

A kadi je beba - tamo je i mat! Groarghhhh!

Ala lipi moji stojte mi kuraju i čuvajte se poskoci! Ovoga leta da jih je kako boba i da su sve bliže kućami i skaču kako nikada nisu skakali! A tek črne udovice!!! I ja san danaska jednu skratila za glavu na terasi ozgor vrata ... Ma znate ča!?

Najbolje će van bit da lipo stojite doma. Čini se da je tako najšigurije!

Mig, mig!!!