Ovo san.

Ko ste mislili da san umrla. Nisan. Još. Umrit danaska je skupo. Brižan onaj ki umre, ni va smrti ne najde mir aš ozgora mora gledat va kakovu lipu kagadu je stavil onih ki su za njin ostali. A ti isti, kad njin voda pride do grla zabe onu poslovicu da se o mrtvimi samo najlipše govori, pa ga više puti zakljenu i tako mu nikakore ne priskrbe pasoš za va raj.

Nadan se da san vas uvjerila da danaska ni dobro umrit. Zato, stojte živi, stojte kuraju i ni za vraga se ne dajte pod zemlju.

Da bite to i ostvarili, čin manje hote po doktorimi. Oni će vas leh na spravit šoto. Prvo će van va glavu stavit da ste bolni. Ondat će vas poslat da se slikate na rengen pa na ultrazvuk i ki zna ča još. Dat će van i besplatnu uputnicu - ako imate onu narandžastu harticu od plastike za nikakovo osiguranje postilje za nedajbože.

E ondat ćete vi zazvat niku bolnicu va koj vas moraju slikat. Zvat ćete jutrin aš van se fuga, a i čuli ste da su redi veliki. Obrnete broj kolo 8 ur jutrin, zvoni, zvoni ... i niki se ne javi. Obrnete kolo 9 opet pa se javi nika ženska. Vi rečete da bite se naručili, a ona van da termin za Božić. Porko toćo! A doktor mi je rekal da mi ni dobro! Ki će čekat do Božića!?

Ta ženska van reče neka lipo zovete drugu bolnicu. I vi zovete drugi dan opet kolo 8 drugu bolnicu. Zvoni, zvoni, zvoni ... niki se ne javlja. Zovete opet kolo 9 ur i opet se javi nika ženska:

-Ča bite?

-Ja bin se naručil za slikat nutarnji organi.

Onda ona počne kričat:

-Ča vi ne znate da se naručuje od polne do dvi!!???

-Ne, aš ja ovo zoven prvi put va životu, kako bin mogal znat?? Dobro, zvat ću na polne opet.

Pride polne i zovete opet. Opet najprvo par puti odzvoni do kraja, a tek potle petoga, šestoga puta van se opet javi nika ženska:

-Ča bite?

-Ja bin se naručil za slikat.

-Danaska ne naručujemo.

-Zač? Jutros su mi rekli da neka sada zoven!

-Sestra ka to dela (amamo koga veloga dela je to!!!) ni prišla na posal. Zovite jutro.

***

Ma zvat ću ja znate kada! Još par puti ovakovih zvanja i čovik je mrt bez sumnje. Va životu ne vridi ni časa gubit z doktori, bolnice i nervože sestre ke se javljaju na telefon. Va životu se rabi smet.

Evo tako san danaska vidila jedan kombić od nike privatne elektro firme i na njemu lipo piše AC munja DC - tako se firma zove. Ejsidisi. Pitan muža ča to ni zaštićeno ime? I onda je počela zajebancija: mogli bimo otvorit obrt za organizirat piri i nazvat ga Blek Sabat; a morda i pogrebno poduzeće Gansendrozis... Pišarija od starih ljudi! Ma istešo, čoviku je odmah lipše va životu čin najde nikakov razlog za smih.

Ča ni tako!?

 

OP. A. Svaka sličnost zi stvarnimi ljudimi ni slučajna. Jedino ča moren reć je - čast izuzetkimi