Zadušena san zadnjih dni. Jedva i dihat arivan. Ma istešo, danaska mi je niki dan posobojan (bi rekal moj pokojni tast). Huncuta san, nervoža, ujidan, z oči mi iskra ... a rano je za PMS ... Neč je divljega va zraku! Tako baren zgjeda ...

Vidin da mi se broj dvanajst nikako slabo čita. To će bit zato ča naši judi jako vole čitat (Alana Forda - u najboljen slučaju) Auto Moto Magazin. Čin je neš dulje o jednoga pedlja na ekranu, to više nikoga ne zanima ... a još ko je i na stranomu jeziku ... Stranijemu i od mađarskoga ... Brižna ja! Z vami takovimi. A i vi z manu, ovakovu. Tvrdoglavu kako tovar, pak ću vas i dalje bombardirat i raketirat, VBR-irat z čakavskimi besedami. Aš mi to pomore, jako. Ovako pišuć, domislin se nikih besed kih san već bila pozabila.

Jiman je'nu prijateljicu Marijicu i skoro svaki božji dan razminimo ku god besedu. I to nan godi. Kako ši kako ne, mi dvi razminimo i nikakove iskustva zi svakodnevnoga živjenja običnoga čovika pa se onda i skupa nasmijemo, aš ispada da smo do grla va istih dreki zi ke god bande gledaš kuliko god nami govorili da je NJIMI slabije nego NAMI i obratno.

Mi dvi bismo skoro mogle reć da smo jedno "ja" na dva mesta. Aš nikako nan se dogajaju iste bedastoće i pritišću nas jako slični problemi.

Zrcalimo se, zrcalimo ... je'ni va drugimi, a da većina s tin ni ili ne želi bit ćaro.

I toti mi na pamet pridu hrenovke. Aš ne moren prestat mislit kako politika vero va sve mora zamišat one svoje debele, masne prsti kako današnje hrenovke (to znači i smrdljive). Pa se pitan ko se još ki domišlja onih Gavrilovićkih va limenki ke su tako lipo vonjale da biš jih bil i presne pojil ...

Ovo je moja 13. kolumna - zato ju pišen na sredu, a ne na petak ;)