Brandy - trandy

Brandy - trandy

ritn by: Elfrida MatučMahulja
03. 10. 2006.

Digo, ovo bi reć da jušto večeraska leto pomalo finjuje zi svojin Urlaubon i gre ća z našega kraja. Ne znan kako je kod vas kadi već ste, ma ovdi jugo lumbarda, škuro se priti z bande Cresa i sve mi se čini da će neverat.

Nevera z Kvarnera - mogla bi bit "brand". Onako kako su nikad tobož prodavali "čistu hrvatsku ariju" (z posebnin akcenton na ono "čistu") va kunšervi (latici, limenki kako god van se pijaža); sada bimo lipo mogli počet punit kunšerve ke bi bile brand ovoga podneblja - kunšerve "Nevera z Kvarnera".

Kvaka je va tomu ča je čista hrvatska arija stalno ovdi, pa te kunšerve nimaju bogznakakovu vrednost, osim morda za Hrvati zi dijaspore ki pate od nostalgije. Z druge bande, nevera z Kvarnera ni baš svakodnevna pojava pak je samin tin cenjenija - em je autohtona ča je sada jako va modi, em je raritetna.

Molila bin lipo da se ova mogućnost ozbiljno razmotri va radionicami/smislionicami hrvatskih brendi.

Ben, danaska san čula da će i ono otkriće kolo one bakterije ka se tako zove da mi bedasti to ne moremo zapamtit, provat zaštitit kako hrvatski brend, a znate čega? Preživljavanja!

Jebenti, suze su mi prišle na oči od smiha. A ne rabi ne nikakova bakterija za brend preživljavanja. T'r je skoro svaki prvi živući Hrvat sam sa sebe već jedan hodeći i dišeći brend preživljavanja. Takovoga živoga brenda nima ni jedna država, a ova naša jih ima šiguro četire milijuni!

Lipi moji sunarodnjaci, a ni susedi nisu niš drugačiji bez obzira ča nan svakimi govore kako je onimi drugimi gore, nemojmo se više trudit i mučit bit trendi. Za to nimamo šoldi. Pogledajmo istini va oči.

Budimo mi ono ča smo. Budimo brendi. Kupimo Brandy, onaj dobri starinski koga više niki ne konzumira (čitaj: loče) furajmo se na brendi i preživimo i ovaj put!

Ala bog! (čitaj: kissss kako je to moderno i trendy, ali nikako brendi u hrvatskoj i inoj Blogosferi)