Kuliko god se nikimi "moralistimi" i vjernicimi na hrvatski način činilo kako ja na jednomu drugomu mestu pišen neč protiv Crikve, za razliku od većine tih istih verujen va Boga.

Ni ovo spovid. Zato neću nastavljat ćakulu o momu verovanju. Iovako, ionako na spovid gren samo kad moran. Bog sve vidi pak tako i moje grihi i ni toga čovika na ovomu svitu ki bi Bogu rabil za mu prenest ono ča san ja zgrišila.

I vavik ću reć da judi najviše lažu jušto kad se spovidaju. Aš su takovi i gotovo.

Dunkve, kolo moga verovanja je sve ćaro. Držin se one da je Bog Bog, a pop pop. I svaka čast svakomu popu. Zibral je svoj posal i neka ga dela pošteno kako čovik, kalujen mu kapu do poda. Ja san pak zibrala ča san ja zibrala ili ča je zibralo mene.

Bog se pak, z druge bande, jušto pokazuje ovih dan našimi kršćanimi ki su zaseli svoje guzičine po svakakovimi katridami, i ki va crikvu hode jušto da bi jih judi i popi tamo vidili - a kolo Boga se va celomu svomu životu nisu zamislili.

Zato njin se je odlučil pokazat. I to va metropoli.

Odlučil njin je pokazat kako je On taj ki je moćan, a ne oni ki su sebi zamisleli da su oni ti. Moćni Bogi ki po zemji hode.

Pak njin je sprid izbori zrondal celu ulicu va škuju va zemji. Kalal jih je na nivo onih dva zi crtića "A je to". Aš jušto takovi i su. Sve su dešvali ča god su mogli. I još vavik jimaju ča za dešvivat.

Počelo je z nikakovin obedon vjerojatno. Toti je sklopljen nikakov "dil" ... a ondat je pokrenut celi domino-efekt ki je zrušil kuću, progutal ulicu ... a koliko vidin hodi i naprid ... Da ne bi bil obični domino efekt z jednu traku; Bog je napravil i kraki (kako na križu), pak su pale i nikakove ostavke (ke baš niki ni očekival), pak su prišle i nikakove zamjerke od velikoga brata evropskoga na količinu korupcije va ovon prćaku ... pak nikakova voda koj niki ne more nać kako i od čega i kadi se je sve zagadila. Sve jušto sprid izbori.

E sada, vidit ćemo kuliko je ta tradicionalno katolička masa va Hrvatskoj, kritična masa i kuliko je spravna povjerovat va Božju providnost i Božji znak i kuliko je vjera jaka.

Je prišla do toga nivoa da tradicionalni katolik ovdika zna pročitat Božji znak ili smo Tome nevjernici, pa nan rabi još i još i još čuda i ukazanja!?

Pozdravljeni lipi moji! Stojte kuraju! I kad vas telefonski anketiraju za koga ćete glasat - pošaljite jih lipo Vragu!

Ala Bog i sve!