Danaska ni nedilja, ma ja ću sveje'no napisat ovih par redi ovdi, aš mi je prišal trentaun.

Ne znan kako vi, ma ja priden doma od posla, vidin kauč, zemen kakovu god mehku ponjavu, zamotan se va nju i ako san vero namečena ćapan daljinski i uključin televiziju.

Od tada do kad dobin sliku na ekran danaska su pasale cele dvi ure. Magar san se malo i naspala čekajuć tu sliku. Bit će poć po novu televiziju - a ča je više gledan sve manje mi se čini potriba. Program - niškoristi. I ono ča je, prvo fini leh je počelo. Jušto počneš gjedat i pokle par minuti vajer ti butaju reklame, a onda to traje i traje i nikad fermat i ti zabiš ča si ono počel gjedat ...

PROGRAMSKA SHEMA ZABAVNO-MOZAIČNE EMISIJE:

1. (šinjorina spikerica, lipa mala z vele sise, ne previše pokrijene, mora se smet od uha do uha celo vrime dokle govori ovako neš): "Dobra večer dragi gledatelji, danaska ni bilo Bog zna čega va našoj zemji, a ono malo ča je bilo ćemo van pokazat odmah pokle reklame!"  - To si očekival pa stojiš kalmo!

1. a)b)c)d)e). (Toniju će zacimentat noge va kabal i pušćat ga da čeka plimu aš se ni prehitil va TELE2; skroz pustinju i prašinu će vozit črni Pežo 308 bez šofera, skroz šume i drmuni nova Laguna; zum-zum ćete se oćutit z Mazdu 3 - jedino ko nimate muh onda van je zum-zum dobro poznato i prez nje; Knorr juhe će van pokazat kako bi bilo lipo živit na kampanji mesto va kući, a Mile z Naše male klinike će odjedanput prodavat krediti ... - Tebi se pomalo grči va trbuhu od nervoze ... "Brini o sebi!" ...

2. (šinjorina je imila vrimena prominit veštu, smih od uha do uha je postojan i poklen celoga bloka reklam) ... "Hi, hi, hi dragi gledatelji, ovo san nazad, če ne da smo brzi!?? Vrag zel i fugu ... aha, da, ča san van ono otila reć? Dotični Z. M. je danaska rekal dotičnomu I. S. da je tovar, a I. S. mu je odgovoril da on ima nepreboljenu dječju bolest i prištići po licu. I još mu je pokazal prosti prst. Ča je bilo pokle!? Nikomure niš - je demokracija ili ni!?? Tornat ćemo se vajer, samo ćemo pozdravit naših sponzori!"

2. a) i b) Munjeni mladić poziva ljudi na pobunu aš ljudi imaju pravo na život z 0% problemi - nego ča nego da je na kraju pal va more! Dobro da mu se ni čagod gorega dogodilo! Srića Bog da je imil Koka kolu Ziro! Vrime je za najpovoljniju kupovinu va jednomu od milijun šoping centri u Lipoj našoj. Hvala klincu da je ovaj va drugoj Županiji! - Ti si pozelenil va licu!

3. (šinjorina spikerica je popravila šminku i nalakirala nohti) "Ovo smo! Hi,hi,hi - menadžerica od pokojnoga nan se ne želi javit na telefon, pa van nimamo ča novoga za reć. Pokle samo jedne reklame pošpijat ćemo ča se događa va Big brader kući - ostanite z nami!!!!"

3. a) SAMO JEDNA REKLAMA: Dvi ovce jedna drugoj šalju SMS poruke kako munjene - KAKO ZNAKOVITO!!! Vlasi su ti se naelektrizirale a dim ti hodi na nos i na uši!

Pogjedaš na uru pol noći! Moreš poć spat. Ča si vidil, ča si čul? Niš. Reklame.

E da, rekla san mužu da gren jutro va Fordov salon. Tamo da poklanjaju četire zimske gume z naplatci od čelika. Neka mi jih provaju ne dat! Tar nigdir nisu ni rekli ni napisali da moran neš kupit prvo! Lipo piše da POKLANJAJU!

Ćo Ford! Gume i čelik na sunce! Baren tuliko nan duguju za reklamni teror koga nad nami delaju svakoga dana va svaku uru bez svake mere! Valjda smo zaslužili te četire faking gume!

Pozdrav z Bodulije!